” لاہور ہائیکورٹ، وقار یونس کی پی سی بی میں تقرری کیخلاف سماعت ملتوی ” | Express News Pro
”
لاہور ہائیکورٹ نے چیئرمین پاکستان کرکٹ بورڈ (پی سی بی) محسن نقوی کے نئے ایڈوائزر اور سابق کرکٹر وقار یونس کی تقرری کے خلاف دائر درخواست پر سماعت ملتوی کردی۔
لاہور ہائیکورٹ کے جسٹس شہرام سرور چوہدری نے شہری مشکور حسین کی درخواست پر سماعت کی۔ اس موقع پر درخواست گزار کی جانب سے ندیم سرور ایڈووکیٹ عدالت میں پیش ہوئے۔
عدالت نے درخواست گزار کے وکیل سے استفسار کیا کہ کرکٹ قوانین کیا کہتے ہیں؟ آپ کس طرح متاثرہ فریق ہیں؟ جس پر وکیل کا کہنا تھا کہ میں پاکستان کا شہری ہوں، اشتہار کے بغیر تقرری کا نوٹیفکیشن جاری کیا گیا۔
وقار یونس نے چیئرمین پی سی بی کے مشیر کی ذمہ داریاں سنبھال لیں
عدالت نے درخواست گزار کو تقرری کا نوٹیفکیشن درخواست کے ساتھ لگانے کی ہدایت جاری کرتے ہوئے کیس کی سماعت عدالتی تعطیلات کے بعد تک ملتوی کردی۔
خیال رہے کہ 6 اگست کو چیئرمین پی سی بی محسن نقوی کے ایڈوائزر وقار یونس کی تقرری کو لاہور ہائی کورٹ میں چیلنج کیا گیا تھا۔ درخواست میں مؤقف اپنایا گیا تھا کہ پی سی بی نے گزشتہ ماہ وقار یونس کو ایڈوائزر مقرر کیا لیکن انہوں نے اب مذکورہ عہدے کے لیے ایک اشتہار دے کر درخواستیں طلب کی ہیں۔
درخواست گزار کی جانب سے کہا گیا کہ محسن نقوی کی زیرِ قیادت پی سی بی نے وقار یونس کی خدمات حاصل کرنے کے عمل میں جو عجیب و غریب طریقہ اختیار کیا، وہ بورڈ کے انتظامی امور کے حوالے سے کئی سوالات کو جنم دیتا ہے۔
”
About The Author
